بجز بشر ہے بھلا کس کو یہ اعزاز ملا (کرسمس غزل)

حمید ہنری مسیحی شاعری مطالعات: 57 پسند: 0

بجز بشر ہے بھلا کس کو یہ اعزاز ملا

کہ خود نشیب سے آکر ہے اب فراز ملا

سنو، زمین و فلک اک سطح پہ اترے ہیں

نظر کرو کہ ہے محمود سے ایاز ملا

کوئی تو مردِ مفکر سے آج کہہ دیتا

حقیقتوں کو سنے، جامہء مجاز ملا

نئے طریق سے دنیا کی اب تعمیر کرے

غریبِِ شہر کے ہاتھوں کو یہ اعجاز ملا

تمام شب سرِ میخانہ رقصِ رنداں ہو

پئے عقیدت ہے کیا جواز ملا

یہ سرد رات میں تیرے ہی قرب کے صدقے

رگوں کو گرم لہو، روح کو گداز ملا

بہت قریب تھی منزل، بہت قریں تھی سحر

مسافتوں کو مگر سلسلہ دراز ملا

سرِ فلک یہ چمکتا ہوا ستارہ حمیدؔ

نجاتِ انساں کے انجام کو آغاز ملا

واپس جائیں