مُسکراتا ہے مِرے غَم پہ جہاں مِلتا ہے

عمانوئیل نذیر مانی غزلیات مطالعات: 51 پسند: 0

میری خُوشیوں پہ مگر نوحہ کُناں مِلتا ہے

میَں بھی بھٹکی ہُوئی یادوں کی کوئی گرد ہُوں اور

وہ بھی گُزرا ہُوا موسم ہے کہاں مِلتا ہے

اِس لئے لوگ کہانی پہ یقیں کرتے ہیں

ایک دُوجے سے بہت اَپنا بیاں مِلتا ہے

ایسا لگتا ہے دِیا سامنے خورشید کے ہو

مُجھ پہ ہنستے ہیں سِتارے وہ جہاں مِلتا ہے

خلقتِ شہر جِسے خُود میں گِنا کرتی ہے

وہ مِری ذات کے خانوں میں نِہاں مِلتا ہے

دِل میں بس خوفِ جُدائی کی ہَوا چلتی ہے

اب تو موسم بھی مَحبّت کا کہاں مِلتا ہے

ایک خُوشبو کا جہاں آج بھی قائم ہے کہیں

ایک پھُولوں کا نگر ہے، وہ وہاں مِلتا ہے

اُس کی آنکھوں میں سرِ شام اُتر جاتا ہُوں

اُس کی چاہت کا مُجھے روز سماں مِلتا ہے

خواب جلتے ہیں مِرے دِل کے نِہاںخانوں میں

اَب تو مانیؔ مِری آنکھوں میں دُھواں مِلتا ہے

واپس جائیں