Fakhta Foundation

ونسینٹ پیس عصیم غزلیات مطالعات: 45 پسند: 0

شہہ کلوری

۔۔۔

تری پاک ذات ہے کبریا تیرا حُسن حُسنِ کمال ہے

تری بے حساب ہیں بخششیں ترا نام ربِ جلال ہے

۔۔۔

ہیں جگہ جگہ اے مرے خُدا، تری صنعتیں، تری رونقیں

یہ حجر، شجر، یہ مہ و قمر، ترا جلوہ تیرا جلال ہے

۔۔۔

تُو ہی ابتدا، تُو ہی انتہا، تُو زماں مکاں پہ محیط ہے

ترے دم سے دم ہے رواں دواں، تری رحمت اپنی مثال ہے

۔۔۔

تری وسعتیں ہیں تو بیکراں، تری عظمتیں ہیں تو بے بیاں

تُو کہاں نہیں شہِ کلوری، تُو مکینِ خواب و خیال ہے

۔۔۔

مری شاعری، مرا فکر و فن، مرے علم پر ہے خجل خجل

میرے لفظ کتنے ہیں مختصر، ترا ذکر کتنا محال ہے

۔۔۔

سبھی زیر و بالا یہاں وہاں، تری غیرتوں کے ہیں سب نشاں

نہیں تمکنت پہ تری نظر، پہ شکستہ دل کو وصال ہے

۔۔۔

ہیں شمار میں ترے سب یہاں سبھی جسم و جاں سبھی ہستیاں

تُو ہی کردگارِ عصیمؔ ہے، تُو کثیر جُملہ خصال ہے

واپس جائیں