سی ٹی آئی تری رخشندہ بہاروں پر سلام
علم و فن کے جاوداں تقدیس زاروں پر سلام
۔۔۔
روتے روتے تیری یادوں میں مٹے جاتے ہیں ہم
گلشنِ دل میں مکیں سیمیں عذاروں پر سلام
۔۔۔
کر چکے ہیں ہم نچھاور جس پہ بچپن اور شباب
ان پرانی، ان سہانی یادگاروں پر سلام
۔۔۔
بچہ بچہ تھا ترے شاداب پھولوں پر نثار
دلکش و جاذب شگفتہ لالہ زاروں پر سلام
۔۔۔
تیرے سبزہ زار کی پگڈنڈیوں کے ساتھ ساتھ
کیکر و سرو سمن شیشم چناروں پر سلام
۔۔۔
تھا نچھاور جن کے فرشِ ناز پر سنڈے سکول
تیری خاکِ پاک کے ان سبزہ زاروں پر سلام
۔۔۔
تھی جہاں فکر و عمل کی شمع روشن رات دن
اونچے اونچے تیرے اُن روشن مناروں پر سلام
۔۔۔
دل میں چبھتے ہیں تری یادوں کے نشتر آج بھی
تیری یادوں کے حسیں دلکش نظاروں پر سلام
۔۔۔
اے مقدس سرزمیں اے غمگساروں کی گلیل
تیرے دامن میں چمکتے چاند تاروں پر سلام
۔۔۔
حاجی پور کالج مرے، ہنٹر پورہ اور رائے ونڈ
جو رہے وابستہ تجھ سے اُن اداروں پر سلام
۔۔۔
جن سے قائم تھی یہاں علم و عمل کی آبرو
فیض بخش و فیض پرور تاجداروں پر سلام
۔۔۔
لُٹ چکا ہے جن کی عظمت کی جوانی کا سہاگ
بام و در کی اُن سہانی یادگاروں پر سلام
۔۔۔
دے رہے ہیں ہم غریبوں کو دُعا تیرے کھنڈر
غم نواؤں، بے قراروں، دل فگاروں پر سلام
۔۔۔
پارہ پارہ کس نے کی ہے تیری صدیوں کی حدیث
تیرے پروردہ مسیحی غم گساروں پر سلام
۔۔۔
تجھ پر نازاں تھا جہاں اور تو تھا فخرِ ایشیا
تیری دیرینہ مقدس یادگاروں پر سلام
۔۔۔
بن گئے اہلِ صداقت کے شررؔ وہ راہنما
بھیجتے تھے جو کبھی روضوں مزاروں پر سلام