گھروں میں سبزہ، چھتوں پہ گُلِ سحاب لئے

نذیر قیصر غزلیات مطالعات: 36 پسند: 0

ہوائیں پھیل گئیں نقش و رنگِ آب لئے

۔۔۔

شبِ سیاہ ڈھلی، صبح آشکار ہوئی

جبیں پہ زخم لئے ہاتھ میں گُلاب لئے

۔۔۔

میں ایک ڈولتا سایا زمیں کے قدموں میں

تو ڈھونڈنے مجھے نکلا ہے آفتاب لئے

۔۔۔

گزر گیا کوئی پہچانتا ہوا مجھ کو

پرانی یادوں کی شمعیں پسِ نقاب لئے

۔۔۔

بکھر کے جاتا کہاں تک کہ میں تو خوشبو تھا

ہوا چلی تھی مجھے اپنے ہم رکاب لئے

۔۔۔

اُبھر رہے ہیں کئی ہاتھ قلزمِ خون سے

کوئی ستارہ لئے، کوئی ماہتاب لئے

۔۔۔

ہوائیں پھرتی ہیں رستوں میں بال کھولے ہوئے

یہ رات سر پہ کھڑی ہے کوئی عذاب لئے

۔۔۔

عجب نہیں، کہیں تعبیر کوئی مل جائے

بھٹک رہا ہوں گِرہ میں ہجوم خواب لئے

واپس جائیں