آثارِ سفر بتا رہے ہیں

نذیر قیصر غزلیات مطالعات: 24 پسند: 0

ہم تیرا سُراغ پا رہے ہیں

۔۔۔

جو پیڑ کٹے ہیں لوگ اُن کو

لاشوں کی طرح اُٹھا رہے ہیں

۔۔۔

آنکھیں ہیں کُھلی ہوئی مگر ہم

خوابوں کو گلے لگا رہے ہیں

۔۔۔

اپنا بھی بدن سُلگ رہا ہے

وہ ہونٹ بھی تھرتھرا رہے ہیں

۔۔۔

لہجہ ہے کہ شمعیں جل اُٹھی ہیں

الفاظ پگھلتے جا رہے ہیں

۔۔۔

دِل رہگذار ہے کسی کی

قدموں کے نشاں بتا رہے ہیں

۔۔۔

لفظوں کے حصار کھینچتا ہوں

مضمون بکھرتے جا رہے ہیں

۔۔۔

کیا صبح قریب آ گئی ہے

کیوں لوگ دئیے بُجھا رہے ہیں

۔۔۔

ہم تیشۂ کربِ آگہی سے

دیوارِ ابد گرا رہے ہیں

واپس جائیں