عالم ہے عجیب حسن کا بھی

نذیر قیصر غزلیات مطالعات: 22 پسند: 0

وہ چاند ہے اور چاند سا بھی

۔۔۔

دن بھر کی تھکن تھی سو گیا میں

یاد آتا کوئی تو جاگتا بھی

۔۔۔

روتے تھے کہ دردِ ہجر کم ہو

اب ختم ہوا وہ سلسلہ بھی

۔۔۔

بے چہرہ ہیں ادھ کِھلے دریچے

ویران پڑا ہے راستا بھی

۔۔۔

طاقوں میں چراغ سو رہے ہیں

چلتی ہے کبھی کبھی ہوا بھی

۔۔۔

لے جاؤں کہاں بچا کے آنکھیں

آئینہ بدست ہے صدا بھی

۔۔۔

اک شخص ملا تھا رات مُجھ سے

کیا تُجھ سا ہے کوئی دُوسرا بھی

۔۔۔

آنکھوں سے چھلک رہی تھیں نیندیں

تھا شوق منائیں رَت جگا بھی

۔۔۔

چُوما تھا کبھی ترے لبوں کو

اب یاد نہیں وہ ذائقہ بھی

واپس جائیں