کیسے دیکھتے اس کو کیسے روکتے اس کو

نذیر قیصر غزلیات مطالعات: 31 پسند: 0

وہ ہَوا کا جھونکا تھا کس کے ہاتھ آتا تھا

۔۔۔

رنگ تھا کہ خوشبو تھا خواب تھا کہ جادو تھا

پردۂ معانی میں شعلہ تھرتھراتا تھا

۔۔۔

چال تھی کہ راہوں میں شمعیں جلتی جاتی تھیں

جسم تھا کہ آئینہ سایا جگمگاتا تھا

۔۔۔

پہلی پہلی راتیں تھیں، لفظ لفظ باتیں تھیں

کوئی خواب سا ہم کو رات بھر جگاتا تھا

۔۔۔

جلتے بُجھتے جاتے تھے نقش سے خیالوں میں

یاد بھی وہ آتا تھا بُھولتا بھی جاتا تھا

۔۔۔

نام سادہ کاغذ پر لکھ کے رہ گئے اُس کا

اس سے آگے کیا لکھتے کُچھ لکھا نہ جاتا تھا

۔۔۔

تیز بارشوں جیسی اِک صدا سی آتی تھی

رات ڈھلتی جاتی تھی، وہ مُجھے بلاتا تھا

۔۔۔

جیسے کوئی آئینہ ٹُوٹ کر بکھر جائے

دل میں لاکھ شکلیں تھیں کچھ نظر نہ آتا تھا

۔۔۔

دیکھتی تھیں کیا کیا کچھ ڈوبتی ہوئی آنکھیں

پُھول کھلتا جاتا تھا، چاند بُجھتا جاتا تھا

واپس جائیں